AYATU AL-QURSIY (Ustadh Fahad Haris)


In ayatu al-qursiy siya na in salagguh-lagguh ayat halaum sin qur’an mahamuliya , laung hi ibnu kathir ha kitab niya tafsir in ayat qursiy siya na in sarayaw-rayaw ayat haluam qur’an sin allahu ta’ah.

Riwayat dain kan ahmad ibn hambal rahima allahu ta’an baytah daing kan Ubay ibn ka’ab kiyaridaan siya sin allahu ta’ala ha sabda sin nabiy in salagguh-lagguh ayat halaum sin qur’an ( ALLAHU LAILAH ILLAH HUWA ) amuna in ayatu al-qursiy.

Damikkiyan kiyabayta hi abu hurayrah sabunnal tuud in ayatul qursiy bang siya nabassa mu sin dum in shaytan dih sumuuk kaymu sahingga maadlaw in hulah.

Iban kiyariwayat daisab bunnal tuud in ayatul qursiy bang mu nabassa sakahabah kaw maubus sumambahayang lima waktu wayruun makaphgang kaymu sumud palum surgah malaingkan kabuhih.

In bay apabila kabassahan sin ayatul qursiy maguy saruun duun halaum niya saytan .
Maytah siya kiyanganan ayatul qursiy?

Duun ha ini kiyabaytah hi imam ahmad iban hi abu daub iban na sin dugaing nila hangkan siya kiyangan sin ngan yaun sabab nasabbut sin nabiy Muhammad salawat iban salam kaniya sin allah , nabangkil duun in duwa dain ha manga ngan sin allahu ta’ala salagguh-lagguh amuna in ( ALLAHU LA ILAHA ILLAH HUWA AL-HAYYU AL-QAYYUM).

اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ (255) 

“ ALLAHU LA ILAHA ILLAH HUWA AL-HAYYU AL-QAYYUM LA TAHKHUDHUHU SINATUH WA LA NAWUM , LAHU MA FIY ASSAMAWATI WA MA FIYR ARD MAN DHA ALLADHI YASHFAU EINDAHU ILLAH BIIDNIHI , YAHLAMU MA BAYNA AYDIHIM WA MA KHALFAHUM WA LAA YUHITUNA BISHAYIN MIN ILMIHI ILLA BIMA SHA’A WASIA KURSIYYUHU ASSAMAWATI WAL ARD , WA LA YAUDUHU HIFDUHUMA HA HUWA AL-ALIYYU AL-ADHIEM."

اللَّهُ لَا إِلَهَ إِلَّا هُوَ

Allah wayruun mapatut pag-ipun iban pagtuhan malaingkan tunggal siya , in lapal ( الله ) in ALLAH lapjul jalala dih siya manjari hi pagngan malangkan tuput kaniya , hatiniya AL- MAHLU in hati sin al-mahlu AL-MAHBUD in mahbud tuhan sin sabarang piyapanjari ha pitung lapis langit iban lupah iban tuhan subay pagtagipunan nila . daing ha sabab yan apabila in muslim umiyan ALLAH in tuhan ku subay siya sumujud kaniya sartah patunggalun in pag-ibadat niya.

In ( لا إله ) ( LAM ) na’fiyya hatiniya payluhan in sabarang tuhan 
( إلا هو) ( ILLA HUWA ) istbath hatiniya malingkan tunggal in ALLAH.

الْحَيُّ

In allah siya in ( ALHAYYU ) : in alhayyu daing ha manga ngan sin allah salagguh-lagguh , hati niya nagsisipat siya sin sipat buhih kakkal salama-lama wayruun salih sabanding.

الْقَيُّومُ

In ALQAYYUM daing ha manga ngan sin allahu ta’ala salaggu lagguh nagsisipat siya sin sipat way sabanding dih siya maghajat sin unu-unu na paltulungan hangsulah unu-unu , buhih kakkal salam lama.

لَا تَأْخُذُهُ سِنَةٌ وَلَا نَوْمٌ

In allahu ta’ala dain manga sipat niya , dih pagkaruun iban dih matug salama-lama , amupaka matug , minsan in karuun dih da . niyapihan ( piyayluhan ) sin allahu ta’ala iban biyahtal niya duun ha jat niya in sipat bukun matup ha jat niya daing ha sabab yan ha sabda sin nabiy Muhammad 

إن الله لا ينام و لا ينبغي له أن ينام

Bunnal tuud in allahu ta’ala maha sutsi mahatinggi dih siya magtug iban dih tuud manjari kaniya in matug.

لَهُ مَا فِي السَّمَاوَاتِ وَمَا فِي الْأَرْضِ

In katan piyapanjari ha pitung lapis langit iban lupah tag-milik niya , sartah siya in tuput tag-amulahi kanila siya in pag-tuhan sin manga makhluq ha taas langit tuput tunggal siya , damikkiyan niya in katan sabarang ha babaw sin gumi iban sin halaum niya , wayruun daing ha manga unu-unu na piyapanjari malaingkan mamudjih kaniya.

مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ

Wayruun maka saapat ha adlaw kiyamat iban ha adlaw pag-hukuman malaingkan daing ha panugut iban ridah niya , muna muna na tuud in sumaapat puas dain ha ijin niya amuna in anabiy Muhammad salawat iban salam kaniya , ampa in sapaatun sin rasul subay sawasah in panawhid pa allahu ta’ala . adapun in manga sila magsisirik palawagun na sila sin tuhan bang hisiyu in maka sapaat kanila , ampa ha adlaw kiyamat mamuasai na in katan magkaniya kaniya na . hisiyu dakuman in sumapaat kaymu bang kaw dih na linguun sin tuhan sabab sin pagsirik mu kaniya.

يَعْلَمُ مَا بَيْنَ أَيْدِيهِمْ وَمَا خَلْفَهُمْ

Kiya iingtan niya in katan parakalah nakauna iban nakahuli , in nakatatampal iban nakatatapuk , iban parakalah jimatuh na iban sin wayruun pa.

وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ

Iban wayruun maka abut maun pa panghati nasabbut biyah na sin ( Kiya iingtan niya in katan parakalah nakauna iban nakahuli , in nakatatampal iban nakatatapuk , iban parakalah jimatuh na iban sin wayruun pa ) in ini wayruun maka ingat kaniya malaingkan pa manga rasul iban nabiy piyi ingat niya ha diin diin na kabayaan niya.

وَسِعَ كُرْسِيُّهُ السَّمَاوَاتِ وَالْأَرْضَ

In kursiy sin allahu ta’ala malagguh daing sin pitung lapis langit iban lupah

وَلَا يَئُودُهُ حِفْظُهُمَا

Iban in allahu ta’ala dih siya pag-laulun iban pag-hapusun iban kabuhgatan iban pag-sumuhun mag-parihalah iban mag-amulahi iban magrijjikih ha katan makhluq niya.

وَهُوَ الْعَلِيُّ الْعَظِيمُ

Iban in allah dain ha manga ngan niya AL-ALIY nagsisipat siya sin sipat wayruun sabnding nanaimbabaw siya ha taas sin arash niya dih manjrai sabandingun hantangun upamahun in sipat niya maun pa sipat sin manga piyapanjari niya .damikkiyan niya siya in tuhan AL-ADHIM tuhan wayruun salih sanbanding duun ha skasipat sipatan niya iban ha jat niya.

Amuyan in daing ha manga maniyu tiyuh pag-pasuuk sin maksud sin ayat al-qursiy mura-murahan kiyahatihan natuh , sarath bang mayan hapalun sin kitaniyu katan , sabab malauggu tuud in pahalah niya.

Bang aun kasaaan iban istung duun ha pagsulat in yan dain ha saytan iban dain kakuh .. allahu ahla wa ahlam.

Piyangawaanj kitab 
• Tafsir ibn kathir duun ha ayat nasabbut suratul nbaqara ayat 255
• Bada’iut tafsir kitab I ibnul qayyim damikkiyan niya duun ha ayat yan .
• Iban qawaidul muthla kitab hi ibnu uthaymin.

No comments:

Post a Comment